ബേക്കല്.കാസർകോട് പള്ളിക്കരയില് ട്രെയിനില് നിന്ന് തെറിച്ചുവീണ് മരിച്ചത് വയനാട് കല്പ്പറ്റ സ്വദേശിനി.
കല്പ്പറ്റ കാവുംമന്ദം മഞ്ജുമലയില് വീട്ടില് എ.വി ജോസഫിന്റെ മകള് ഐശ്വര്യജോസഫ് (30) ആണ്
വെള്ളിയാഴ്ച രാത്രി നടന്ന അപകടത്തിൽപ്പെട്ട് മരിച്ചത്. പള്ളിക്കര മാസ്തിഗുഡ്ഡയിലാണ് യുവതിയെ പാളത്തില് വീണുകിടക്കുന്ന നിലയില് കണ്ടത്. രാത്രി പത്തോടെ കാസര്കോട് റെയില്വെ പൊലിസാണ് ഒരാൾ ട്രെയിനില് നിന്നും തെറിച്ചുവീണ വിവരം ബേക്കല് പൊലിസിനെ അറിയിച്ചത്. എസ്.ഐ കെ. ശ്രീജേഷിന്റെ നേതൃത്വത്തില് പാളത്തില് തിരച്ചില് നടത്തുകയും നാട്ടുകാരുടെ സഹായത്തോടെ കണ്ടെത്തുകയുമായിരുന്നു. തലക്കും കൈകാലുകള്ക്കും ഗുരുതരമായി പരിക്കേറ്റ ഐശ്വര്യയെ ഉടന് തന്നെ കാസര്കോട് ജനറല് ആസ്പത്രിയില് പ്രവേശിപ്പിച്ചെങ്കിലും മരണം സംഭവിച്ചു. നീല ജീന്സ് പാന്റും ചെക്ക് ഷര്ട്ടുമാണ് യുവതി ധരിച്ചിരുന്നത്. തൊട്ടടുത്ത് നിന്നും ലഭിച്ച ഹാന്റ് ബാഗും അതിനകത്തുണ്ടായിരുന്ന പഴ്സും പരിശോധിച്ചപ്പോഴായിരുന്നു മരിച്ചത് കല്പ്പറ്റ സ്വദേശിനയെന്ന് മനസിലായത്.
